Samuel Giger gudogna la lutga finala a la Lutga dad Unspunnen cunter Adrian Walther. Cun 59 puncts e sis victorias durant sis lutgas cuntanscha el la victoria da la festa. Walther terminescha la festa sin il 4. rang.
La lutga finala
Samuel Giger, il lutgader dal chantun Turgovia è en la lutga finala da la lutga dad Unspunnen. Samuel Giger è l’unic lutgader tgi ha gudagnà tut las tschintg lutgas da la lutga ad Interlaken. En la tschintgavla lutga ha Giger batti a Steven Moser.
Entant che Samuel Giger curra tras la lutga ha Armon Orlik pers per l’emprima giada. Suenter il pari en la quarta lutga ha il lutgader da Maiavilla pers cunter Pirmin Reichmuth. Orlik na ha uschia nagina schanza pli sin la lutga finala. Sper Orlik ha era Werner Schlegel pers la tschintgavla lutga.
Che Samuel Giger è en la lutga finala e po cumbatter per il titel dal retg dad Unspunnen è stà cler. Il segund finalist è il bernais Adrian Walther.
Festa da lutga dad Unspunnen
Mintga ses onns s’entaupan ils megliers 120 lutgaders svizzers ad Interlaken sin il prà da la «Höhenmatte» per curunar il retg dad Unspunnen. La davosa giada è quai grategià a Christian Stucki. Il retg da lutga da la festa federala da Zug ha uschia realisà sco in dals paucs il «double». Stucki ha gudagnà la curuna dal retg tar ina festa federala, dentant er tar la lutga dad Unspunnen.
Fabian Staudenmann e Samuel Giger èn ils favurits
Omadus lutgaders han mussà fin ussa ina stagiun extraordinaria. Fabian Staudenmann ha segira fatg il pli grond sigl da prestaziun. Gia la stagiun passada era ina fitg buna per il lutgader bernais. La stagiun actuala è dentant extraordinaria. Staudenmann ha gia gudagnà set lutgas. Tranter auter las lutgas da muntogna dal Schwarzsee e dal Weissenstein, vitiers era anc la lutga dal chantun Berna. Il lutgader da 23 onns tutga tar ils fitg gronds favurits. Sco era Samuel Giger. Il lutgader dal Toggenburg è stà il meglier lutgader dals ultims onns. Giger ha adina puspè gudagnà grondas lutgas. Uschia per exempel gia tschintg giadas la lutga sin la Schwägalp. Be tar las lutgas federalas ils onns 2019 e 2022 na ha el savì accumplir las aspectativas.
Armon Orlik tranter ils favurits
Il lutgader grischun lutga puspè sco ch'el lutgava en ses megliers temps. Suenter che Armon Orlik ha midà ses conturn, el ha tranter auter fatg midada da Maiavilla a Rapperswil Jona per trenar là cun ils ferms lutgaders dal Toggenburg, ha el puspè cumenzà da gudagnar festas. Durant questa stagiun è el stà trais giadas il victur dad ina festa. La gronda finamira da la stagiun spetga dentant uss ad Interlaken. Tut la preparaziun ha Armon Orlik concepì in vista a la festa dad Unspunnen.
Duas premieras grischunas
Sper Armon Orlik èn era anc Christian Biäsch da Tavau e Marc Jörger da Domat da la partida tar il punct culminant da la stagiun. Tant per Biäsch sco era per Jörger è la festa da lutga dad Unspunnen ina premiera. Anc mai eran els da la partida tar l’inscunter dals megliers 120 lutgaders svizzers sin la «Höhenmatte» ad Interlaken.
