Ils ZSC-Lions èn campiuns svizzers da hockey. En la finalissima han ils Turitgais battì Losanna cun 2:0 ed han uschia decidì la seria da playoff cun 4:3. Per ils Lions èsi il 10avel titel da campiun svizzer. Losanna percunter sto anc adina spetgar sin ses emprim titel.
En il gieu decisiv han ils Turitgais davent da l'emprima minuta surpiglià la batgetta dal gieu. L'equipa romanda ha pudì tegnair la nulla fin en la 40avla minuta. Lu ha il Svedais Jesper Fröden sajettà en avantatg ils Lions da Turitg. En l'ultim terz ha il Finlandais Juho Lammikko procurà per il 2:0 e la decisiun. En las ultimas minutas ha Losanna bain anc empruvà da reagir e d'evitar la terrada, propi en privel n'è la victoria dal ZSC dentant betg pli stada. Memia suverana ha la defensiun turitgaisa ed il goli Simon Hrubec giugà.
Guardà sur l'entira stagiun èn ils Lions il campiun svizzer merità. Els han gudagnà cleramein la qualificaziun, han lura gudagnà las serias da quartfinal e mezfinal mintgamai cun 4:0. Pir en il final èn els, cun Losanna, fruntà sin in adversari che ha pudì tegnair pitg. La finala han ils Turitgais er dumagnà quest obstachel.
6. partida: Losanna gudogna 5:3 – la Belle sto decider
Losanna ha gudagnà il sisavel gieu dal final dals plaoyffs cunter ils ZSC Lions. Quai a chasa cun 5:3. A l'equipa turitgaisa n'èsi uschia betg reussì da segirar il titel da campiun svizzer anticipadamain. Perquai datti l'auter mardi saira ina «finalissima» en la seria dal final dals playoffs dal hockey svizzer.
5. partida: Dus pucks da match per il ZSC
Ils Turitgais han gudagnà la 5avla partida da la seria da final cunter Losanna. Quai a chasa cun 3:0. En la seria mainan ils Turitgais uschia cun 3:2.
La decisiun è crudada curt avant la fin dal segund terz. Ils Turitgais han tutgà gist duas giadas aifer 51 secundas ed èn ids en avantatg cun 2:0. Quest avantatg n'han els alura betg pli dà or da maun, mabain augmentà el cun in ulteriur gol.
4. partida: Losanna egualisescha puspè la seria
Il HC Losanna ha gudagnà en il final dals playoffs la 4. partida cunter ils ZSC Lions a chasa cun 5:2. Uschia statti en la seria da best of seven 2:2. Cun quai èsi er cler ch'il final va almain sis rundas. Il gieu numer 5 ha lieu gievgia a Turitg. Ils ZSC Lions han tar quest gieu mussà lur prestaziun la pli flaivla fin ussa en quest final.
Suenter questa quarta victoria a chasa en la seria vegn l’aria plaun a plaun stgarsa. Omaduas equipas dovran mo pli dus success per il titel da campiun. Per Losanna fissi l’emprim, per il ZSC il dieschavel. D’ina differenza da classa n’è dentant enfin uss nagut da vesair. Losanna ch’aveva sco terz da la qualificaziun gì 18 puncts pli pauc ch’ils Turitgais ed aveva pers omadus gieus da chasa, era en mintga gieu sin il medem nivel, n’ha dentant betg pudì nizzegiar ordaifer sias schanzas.
3. partida: Ils ZSC Lions van puspè en avantatg
Ils ZSC Lions van puspè en avantatg en il final dals play-offs. Ils Turitgais han battì a chasa Losanna cun 4:2. Quai suenter ch'els eran anc en retard cun 1 :2, suenter la mesadad da la partida. En la seria statti uschia 2:1 per ils ZSC Lions. Als Turitgais mancassan uschia anc duas victorias per il buccal. La proxima partida è mardi a Losanna.
2. partida: Losanna vegn d'egualisar la seria
A Losanna èsi gartegià la gievgia saira d'egualisar la seria dal final playoff cunter ils ZSC Lions al 1:1. Uschia cumenza tut da nov en la terza partida la sonda a Turitg.
En la segunda partida vegn Losanna a chasa tar ina victoria da 4:2 cunter ils ZSC Lions. Quai munta per ils Lions l'emprima terrada insumma en quests playoffs.
Bain ha Sven Andrighetto sajettà ils Turitgais gia en la 4. minuta en avantatg. Suenter èn ils da Losanna vegnids adina meglier en la partida. En il davos terz han Damien Riat e Michael Raffl mess il puck en il gol turitgais, ed augmentà dal 2:2 al resultat final da 4:2.
1. partida: La seria cumenza cun ina victoria turitgaisa
Ils ZSC Lions han gudagnà l'emprima partida dal final dals playoffs. Els han battì Losanna a chasa cun 2:1 – quai suenter esser stads davos cun 0:1 suenter l'emprim terz. En il segund terz han ils Lions pudì volver il gieu. E cun questa victoria han ils Turitgais era gudagnà la novavla partida da ses playoffs.
Tge spetga en il final?
La fasa finala po cumenzar. Durant ch’ils ZSC Lions vulan gudagnar il 10avel titel da campiun svizzer en l’istorgia dal club stat Losanna per l’emprima giada insumma en in final. Il grond favurit è e resta dentant Turitg. Per l’ina han ils ZSC Lions gudagnà la qualificaziun e per l’autra èn els marschads tras ils playoffs senza mussar ina suletta flaivlezza.
En il quartfinal han ils ZSC Lions battì Bienna cun 4:0 ed era la seria da mezfinal cunter l’EV Zug è ida a fin cun 4:0. Reusseschi era da gudagnar la seria da final fiss Turitg il nov campiun svizzer e gudagnass uschia l’emprim titel dapi il 2018.
Losanna n'ha da perder nagut, emprova dentant da scriver a fin quest chapitel da success. Ils da Losanna han cunzunt persvadì defensiv e cun in goli brigliant. La davosa seria da playoff encunter Turitg, il quartfinal dal 2021, aveva l’equipa da la Svizra franzosa però pers cun 2:4.
