5. partida dal mezfinal
Fribourg-Gottéron vs. Lausanne HC
Lausanne HC è en il final dals playoffs – per l'emprima giada. Il club vadais ha gudagnà la 5. partida cunter Fribourg-Gottéron cun 4:2 e van grazia ad in 4:1 en la seria vinavant en il final. Là frunta Losanna sin ils ZSC Lions. La seria da «Best-of-Seven», en quella ch'i va per il titel da campiun, cumenza mardi a Turitg.
4. partidas dal mezfinal
EV Zug vs. ZSC Lions
Ils ZSC Lions han cuntanschì il final dals playoffs da la National League che cumenza ils 16 d’avrigl 2024.
Ils Turitgais han gudagnà la quarta partida dal mezfinal dals playoffs, ordaifer cunter Zug, quai cun 2:0. Cunquai han ils ZSC Lions gudagnà la seria da «Best-of-Seven» cun 4:0.
Suenter l'emprim terz stevi anc 0:0. L'emprim gol per ils ZSC Lions ha sajettà Derek Grant en la 22avla minuta. Il gol decisiv al 2:0 per ils ZSC Lions ha fatg Denis Malgin en la 34 avla minuta.
Lausanne HC vs. Fribourg-Gottéron
En l'auter mezfinal ha Losanna pudì confermar il «break». Ils Vadais han gudagnà la quarta partida dal mezfinal cunter Friburg cun 3:1 ed ussa manca anc ina victoria per cuntanscher il final. En la seria da «Best-of-Seven» maina Losanna cun 3:1.
En il segund terz ha Michael Raffl da Losanna fatg l'emprim gol da la partida, quai en la 39avla minuta. En la 43avla minuta ha lura Chris DiDomenico da Friburg egualisà al 1:1. En la 47avla minuta è lura danovamain Losanna ì en avantatg tras in gol da Tim Bozon ed il gol al 3:1 ha fatg Théo Rochette da Losanna.
3. partidas dal mezfinal
EV Zug vs. ZSC Lions
Ils ZSC Lions domineschan vinavant lur playoff encunter l'EV Zug e gudognan cun 5:2. Cumenzà cun l'emprim gol en l'emprim terz, hani ils liuns da Turitg lura tratg vinavant la situaziun al 3:1 a la fin dal segund terz. En il terz terz han ils Lions rinforzà lur avantatg al 5:2 final.
Uschia mainan ils ZSC Lions la seria da best of seven cun 3:0 e dovran mo anc ina victoria vegnir en il final. La proxima chaschun datti glindesdi.
Lausanne HC vs. Fribourg-Gottéron
Losanna gudogna il terz gieu dal mezfinal ordaifer cun 2:0 cunter Friburg-Gottéron. Ils Friburgais han bain dominà la partida, n'han la finala però betg pudì metter il puck en la rait. Uschia èn ils emprims dus terzs restads senza gols. En l'ultim terz hai lura dà 2 gols per Losanna aifer 10 minutas. A Friburg n'hai la finala gnanc gidà pli da prender ord il gieu il goli.
Losanna maina cun quest break ussa la seria da best of seven cun 2:1.
2. partidas dal mezfinal
EV Zug vs. ZSC Lions
Ils ZSC Lions fan vinavant squitsch sin l'EV Zug. Ils Turitgais han era gudagnà la segunda partida da la seria da best-of-7 cunter Zug. Quai cun 1:0. Tutgà sco unic en questa partida e cunquai procurà per la victoria turitgaisa ha Sven Andrighetto en la 54avla minuta suenter ina situaziun nunsurvesaivla avant il gol da l'EV Zug. En la seria mainan ils ZSC Lions uschia cun 2:0.
Lausanne HC vs. Fribourg-Gottéron
Losanna ha egualisà a moda dramatica la seria cunter Fribourg. Jason Fuchs ha marcà il gol a la victoria da 3:2 en la 107avla minuta, en la terza prolungaziun.
Bain han omaduas equipas dà gas, ed era giugà en las prolungaziuns in hockey offensiv. Ils dus golis han dentant impedì ina decisiun pli prematura. En il temp da gieu regular aveva Fribourg anc prendì suenter in retard da 0:2.
1. partidas dal mezfinal
ZSC Lions vs. EV Zug
En ils playoffs han ils ZSC Lions gudagnà l'emprim gieu dal mezfinal cunter l'EV Zug cun 5:2 e mainan uschia la seria cun 1:0.
Atgnamain avevi cumenzà bain per ils da Zug. Fin la 32avla minuta manava Zug tras in gol da powerplay dal defensur Niklas Hansson cun 1:0. Dentant suenter quest bun start è la partida sa volvì. La figura decisiva da la partida è stà Niklas Hansson – e betg pervia da ses 1:0. Suenter 33 minutas ha il Svedais sa mussà nunschenà, nundisciplinar. Ils referents han valità ses culp cun il bastun tranter las chommas da Sven Andrighetto sco acziun nunsportiva. La finala han ils ZSC Lions pudì volver il gieu e tutgà trais giadas durant il powerplay lung entaifer bun trais minutas.
Fribourg-Gottéron vs. Losanna
Fribourg-Gottéron batta Losanna en l'emprim gieu dal mezfinal dals playoffs cun 2:1 e maina uschia la seria cun 1:0.
Il culp decisiv ha la legenda dal club, Andrej Bykow, fatg en la 44avla minuta. Per il star da 36 onns che terminescha la fin da la stagiun sia carriera, èsi stà l'emprim gol en ils playoffs da quest onn. Fribourg ha cunquai pudì volver il gieu suenter che Lawrence Pilut ha manà Losanna suenter 8 minutas en avantatg. Ryan Gunderson aveva lura procurà per il pari.
