L'interpresa che producescha dapi il 2018 skis a Mustér mida sin la primavaira a Zezras. Quai ha confermà il mainafatschenta Bruno Kernen envers RTR. Il motiv principal saja stà la difficultad da chattar persunas dal fatg per occupar las plazzas. Actualmain vegnia il persunal da lunsch davent.
Cun la midada spetgan ins d'avair in pli grond intschess per chattar il persunal tschertgà, explitgescha l'anteriur campiun mundial da cursa rapida vinavant. Enfin sin ina da las otg collavuraturas e collavuraturs fixs e libras vegnan tuttas a far midada a Zezras.
Fundà il 2018
Dapi il 2018 producescha la firma Anavon skis a Mustér. Quella firma è vegnida fundada, suenter ch'il producent da skis Zai ha decidì da bandunar Mustér. Ils collavuraturs stuevan tschertgar in'autra plazza. Emprim mainafatschenta da la Anavon Ski SA è stà Simon Jacomet, il fundatur da Zai. El ha dentant decidì da bandunar la firma suenter 14 mais – quai pervia differentas opiniuns en la suprastanza.
