Grazia a dapli entradas da taglia che spetgà, serra il quint 2023 da la vischnanca da Tavau cun in gudogn da 17,8 milliuns francs. Las entradas totalas da Tavau muntan a 140 milliuns francs, scriva la vischnanca. Quai è 10% dapli che budgetà. Sco la vischnanca scriva en sia communicaziun, stoppia il svilup da las finanzas vegnir observà fitg attent. Era perquai ch'il pe da taglia per l'onn current saja vegnì sbassà per 8 puncts procentuals.
Investiziuns planisadas da passa 45 milliuns francs
Quest resultat positiv saja impurtant per las proximas investiziuns sco il center dal vitg che duai vegnir creà da nov u er per la strategia da spazi d'abitar. En tut sajan planisads investiziuns da passa 45 milliuns francs.
Las investiziuns fitg autas vegnian a reducir ils meds liquids ils proxims onns. Ultra da quai stoppian ins prender si chapital ester per realisar la nova concepziun dal center local a Tavau Vitg. Sco la vischnanca scriva procuria il fitg bun resultat per 2023 ch’il volumen, che duai vegnir finanzià cun meds esters, vegn ad esser in pau pli pitschen.
