Philipp Wilhelm è vegnì reelegì sco president communal. Il socialdemocrat ha retschavì 2'096 vuschs, tar in pli absolut da 1'343. Cunquai ha l'um da 35 onns survegnì 78% da las vuschs valaivlas.
Quest resultat legra mai zunt fitg e motivescha da lavurar vinavant.
Il Socialdemocrat e landamma en uffizi resta cunquai fin la fin dal 2028 a la testa da la segund gronda vischnanca grischuna. Ses sulet cuntracandidat Giovanni Croce (senza partida) n'ha betg gì schanzas. El ha survegnì 482 vuschs, tge che correspunda a 18% da las vuschs valaivlas. Las autras partidas n'avevan betg attatgà il sez da Wilhelm. Ulteriuras radund 100 vuschs èn idas a singulas persunas.
Vinavant sco fin qua
Il schaner 2021 ha Philipp Wilhelm cumenzà sco landamma ed el vul cuntinuar cun sia lavur ch'el ha fatg fin qua. Ils proxims onns saja da metter in accent tar la planisaziun dal territori. I saja impurtant d'accelerar la revisiun da la planisaziun dal territori. Quella gidia a garantir avunda sco er economicamain supportabel spazi d'abitar per la populaziun. En pli vul il socialdemocrat cuntinuar cun ils temas ch'el ha lantschà. Per exempel veglia el promover vinavant la cumpatibilitad da lavur e famiglia u la politica da clima.
Ulteriuras elecziuns da renovaziun
En vista a la proxima legislatura (2025 fin 2028) spetgan a Tavau suenter l’elecziun dal landamma anc ulteriuras elecziuns da renovaziun. Quellas han lieu ils 22 da settember.
- «Kleiner Landrat»: las ulteriuras quatter persunas che fan part sper il landamma da la suprastanza communala.
- «Grosser Landrat»: 17 commembers e commembras dal cussegl da vischnanca
- 4 persunas che fan part dal cussegl da scola ch’il suveran elegia
