Correspundent als dus dis spezials da «Voll giuven» ha RTR envidà duas uniuns da giuventetgna - betg sco davos era per passentar ensemen ina patgifica saira. Dentant avant ch'ils candidats e las candidatas han pudì giudair ils drinks ed ils snacks, han ils teams l'emprim stuì sa cumprovar en la challenge «voll giuvna».
Il gieu ha cumenzà cun la categoria «voll gas», nua che las duas uniuns han stuì preparar in pitschen pled da persvasiun ed argumentar, pertge ch'ellas vulan gudagnar oz. Suenter hai dà ina runda da quiz cun il tema «voll regiunal». En la categoria «voll teamwork» han las gruppas stuì metter ensemen in puzzle. Las parts da puzzle eran repartidas en il local e na dastgavan betg vegnir tutgadas cun ils mauns. Silsuenter èsi ì vinavant cun «voll bustabs», ina furma da quiz nua che la reacziun e la sveltezza èn stadas dumandadas.
Per far tut in zic pli divertent, han tuts stuì discurrer cun la bucca plain marshmallows (hihi). En la runda finala han ils candidats e las candidatas gì da fabritgar or da gasettas, bindels da tatgar e fistets da lain la pli auta tur entaifer tschintg minutas – tut tenor il motto «voll stabil».
La fin aveva l'uniun da Dardin il nas davant. L'uniun ha cumprovà sia savida da fisica en la pratica, ed ha nizzegià la stabilitad da trianguls ed uschia cuntanschì autezzas maiudidas cun lur tur. Gratulaziun a l'uniun per lur victoria ed il premi, in bon da 200 francs!
