Il 2022 èn giuvens e giuvnas en Svizra vegnidas dumandadas per in studi: Avais vus bavì alcohol almain ina giada ils davos 30 dis? E 17% d'ellas ch'eran 15 onns veglias han respundì «gea».
La definiziun uffiziala d'esser sturn, pia baiver dapli che quatter u tschintg magiels alcohol, vegn classifitgà sco «consum episodic ristgà». Ils ristgs èn tenor Susanna Gadient tranter auter accidents, violenza, intoxicaziuns, contacts sexuals ristgads, a lunga vista er donns per la memoria e las abilitads d'emprender. Susanna Gadient maina l'Uffizi dal servetsch social dal chantun Grischun.
Gist a festas da la giuventetgna cula alcohol. Al «Terratrembel» a Puntraschigna èn quai il 2023 per exempel stà 540 liters gervosa e cnap 100 liters spirituosas. Quai tenor indicaziuns da l'uniun da giuventetgna da Puntraschigna. Quai per circa 630 persunas.
En Surselva èn las cifras fitg sumegliantas, di Mario Albin da Albin Vins e Bubrondas da Trun. Per 300-400 visitaders e visitadras tar ina festa da giuventetgna quinta el en media:
- 300 liters gervosa,
- 400 buttiglias Smirnoff
- 20 buttiglias vodka alv
- 2 buttiglias vodka tschetschen
- 20 buttiglias vodka verd
- 1-2 whiskys
- 12 Sure Öpfel
- 5-6 grondas buttiglias da Jägermeister
- 6 tequilas
- 6 gins
- ed adina pli popular; Berliner Luft (36 buttiglias)
E Mario Albin ha er ina clera teoria, tge ch'è davos quai: I na dettia nagut auter da far a las festas. Alternativ propona el per exempel ina karaoke, u da sautar.
Datti autras purschidas per la giuventetgna?
En il Grischun dettia dentant ina vasta purschida d'activitads per il temp liber. Ed i dettia er la pussaivladad da lavur da giuventetgna, di Susanna Gadient dal chantun Grischun. La vardad è er; Ina persuna en Svizra baiva en media ina buna part dal alcohol che vegn bavì tar ina festa da giuventetgna.
E Susanna Gadient di, dumandà sche tut las persunas a talas festas da giuventetgna, sajan pia alcoholicras ed alcoholichers; Ella descrivess il consum sco «episodic ristgà», quai na saja però betg da cumparegliar cun ina dependenza d'alcohol.
Corrigenda: En l'emprima versiun publitgada da quest artitgel è vegnì scrit d'in studi ch'ha mussà che 17% dals giuvens e da las giuvnas cun 15 onns èn stads almain ina giada sturns ils davos 30 dis. Quai n'è betg stà correct, correct è ch'els avevan bavì almain ina giada alcohol.
