Kim Manetsch da Mustér ha 23 onns e lavura dapi passa quatter onns sco tgiradra d'animals en il zoo da Turitg. Quai era sia professiun da siemi e perquai è ella s'annunziada suenter l'emprendissadi commerzial per ina plazza en il zoo. En ses mintgadi ha Kim Manetsch da far cun da tuttas sorts animals sco schimgias, reptils, coalas u era chauns da mar. Tar sias incumbensas tutga schubregiar ils spazis da viver, preparar da mangiar, ma surtut era controllas ch'ils animals èn sauns.
Il pli fitg plascha a mai il contact cun ils animals e che jau poss esser mintga di enturn els. Mia lavur è mintga di autra cunquai che era la luna dals animals è mintga di differenta. Els na discurran betg, ma els mussan.
Daco datti atgnamain zoos?
Ina giada, avant passa 1’000 onns eran zoos insatge dals imperaturs e retgs. Cun ils animals selvadis sco tighers ed elefants mussavan els lur pussanza e quant ritgs ch’els eran. La glieud pli paupra dastgava be guardar ils animals tar occurrenzas spezialas. E co ch’i gieva lura als animals, n’interessava da lez temp anc strusch insatgi. Ils zoos sco nus enconuschain els oz èn sa sviluppads pir bler pli tard.
Dovri atgnamain anc oz in zoo?
Adina puspè èn zoos era en la critica. Èsi insumma giustifitgà ch'i dat ozendi anc zoos? Lieus nua che animals selvadis che vivan er anc bain en la natira vegnan serrads en u er animals che vegnan tegnids en lieus fitg lunsch davent da lur dachasa? Cun talas criticas è era Kim Manetsch magari confruntada. Tenor ella dettia dentant bler che stat davos in zoo che n'è betg pertschert a mintgin e mintgina.
Il zoo Turitg s'engascha per la protecziun da spezias ed ambient. Perquai vul il zoo en l'avegnir era be avair animals ch'i na dat strusch pli en la natira u ch'èn periclitads. Latiers sustegna il zoo differents projects cun quest intent. Quai motivescha mai fitg da lavurar per quest zoo.
