A Cyril Fähndrich, il frar da la passlunghista Nadine Fähndrich, gartegia al Tour de Ski in coup. Il Lucernais da 24 onns ha fatg il terz plaz en la Val di Fiemme sur 15 kilometers classic cun partenza da massa.
Sco el ha ditg envers SRF, hajan er ils skis sezs contribuì a quest resultat. Ils skis sajan uschè sperts, che nagin possia surpassar el. Gudagnà ha dentant Erik Valnes da la Norvegia, segund è daventà il Svedais William Poromaa.
Tar las dunnas è la megliera Svizra stada Désirée Steiner sin plazza 16, Nadja Kälin è vegnida 21avla. Nadine Fähndrich n'è betg pli stada a la partenza.
Biatlon ad Oberhof
Lena Häcki-Gross è vegnida 10avla da la cursa da persecuziun ad Oberhof en la Germania. Ella è sa meglierada da plazza 16 ch'ella aveva fatg en il sprint. Sch'ella n'avess betg manchentà duas giadas la schiba, avess Häcki-Gross pudì cumbatter per ina plazza da podest.
Amy Baserga ha medemamain fatg bun insaquants plazs ed è vegnida 21avla. Gudagnà la cursa da persecuziun ha la victura dal classament general da la stagiun passada, la Franzosa Julia Simon.
Ils umens svizzers han fatg il pass cuntrari en la cursa da persecuziun. Sebastian Stalder è crudà enavos da la plazza 9 dal sprint sin plazza 17, e Niklas Hartweg da 17 sin 29. Gudagnà ha il Norvegiais Endre Strömsheim.
