Gudagnà a moda suverana ha Kerttu Niskanen. La Finlandaisa ha battì la Svedaisa Ebba Andersson per 18 secundas. La terza, la Russa Natalia Nepryaeva, ha gia pers passa ina mesa minuta sin Niskanen. Nadine Fähndrich sco 14avla ha gì in retard da passa ina minuta, è dentant tuttina stada paucas secundas pli svelta che l’Americana Jessie Diggins ch'aveva gudagnà il sprint da l’emprima etappa.
Laurien van der Graaff ch’è stada per la davosa giada a la partenza ad ina cursa da la cuppa mundiala en Svizra ha terminà quest’etappa da 10 kilometers stil classic sin plazza 43 cun in retard da bunamain duas minutas. Cun Lydia Hiernickel sco 49avla sa chatta anc in terza svizra sut las top 50.