Marco Schällibaum è il nov trenader dals Grasshoppers. Quai ha communitgà il club da la Super League. Schällibaum succeda uschia a Bruno Berner ch’è vegnì relaschà mardi. Fin l’october passà ha l’um da 62 onns trenà Yverdon. Schällibaum duai salvar il campiun da record da la relegaziun che smanatscha: GC sa chatta actualmain sin il penultim plaz da la tabella.
Mardi saira han ils Grasshoppers communitgà che Bruno Berner vegn relaschà. E mesemna a bun'ura è gia vegnì enconuschent tgi che succeda. Igl è in vegl enconuschent: Marco Schällibaum. L'um da 62 onns ha gia trenà divers clubs en la Super League ed ha sco davos prestà buna lavur tar Yverdon, nua ch'el è vegnì relaschà l'atun passà. Tar GC è el be stà activ sco giugader. Ils onns 1980 è el trais giadas vegnì campiun ed ina giada victur da la cuppa.
Sia missiun cun GC saja da salvar l'equipa da la relegaziun. Ils Turitgais èn actualmain sin plazza 11 da la tabella, quai che munta ch'i pudessan bainprest vegnir relegads.