Marco Odermatt è sco spetgà il sportist da l'onn svizzer. Il skiunz da la Sursilvania ha survegnì questa distincziun a chaschun dals Sports Awards, e quai per la terza terza giada en seria. Per la segunda giada daventa Lara Gut-Behrami sportista da l'onn.
Ils victurs e las victuras en la survista:
- Sportista da l'onn: Lara Gut-Behrami
- Sportist da l'onn: Il skiunz Marco Odermatt
- MVP da l'onn: Il giugader da ballape Manuel Akanji
- Sportist paralimpic da l'onn: Il sportist en sutga cun rodas Marcel Hug
- Team da l'onn: Squadra da tennis da las dunnas
- Trenader da l'onn: Il scheftrenader dals umens da skis Thomas Stauffer
- «SRF 3 Best Talent Sport»: La skiunza Stefanie Grob
Per la segunda giada suenter il 2016 è Lara Gut-Behrami vegnida premiada sco sportista da l'onn. La Tessinaisa ha persvadì cun 9 plazzas da podest da la cuppa mundiala en la davosa stagiun da skis, tranter quellas 3 victorias. Uschia n'hai betg dà in'ulteriura victoria da la famiglia Kambundji: Suenter che Mujinga aveva triumfà l'onn avant, era la sora Ditaji questa giada tranter las davosas 3. Dentant ha ella stuì laschar la precedenza a Gut-Behrami gist sco la ciclista Marlen Reusser.
Tar ils umens ha Marco Odermatt gudagnà la premaziun sco sportist da l'onn per la terza giada en successiun. Il dubel campiun mundial e victur da la cuppa mundiala generala, ha fatg cun 2'042 puncts da la cuppa mundiala in nov record. «D'astgar prender encunter questa trofea per la terza giada en successiun è incredibel», ha Odermatt ditg. El è sa mess tras cunter il victur da l'Unspunnen Samuel Giger e l'atlet lev Simon Ehammer.
