- Reto Attenhofer , anteriur lutgader activ e manader tecnic dals lutgaders grischuns tar la Festa federala da Zug. Victur d'in cranz federal tar la festa dal 2004 a Lucerna.
- Paul Orlik , anteriur judoka e lutgader activ, participant da la festa federala l'onn 1995 a Cuira e bab dals lutgaders da classa Armon e Curdin Orlik.
- Il giuven Claudio Regli . Giuven da 18 onns che ha gist cumenzà cun quest sport.
- Jon Fadri Carpanetti , anteriur lutgader e trenader. Actualmain manader tecnic da la Societad da lutga engiadinaisa.
La festa federala da lutga è mintga trais onns il punct culminant da l’onn da lutga. Be ils megliers lutgaders da las tschintg differentas federaziuns da lutga svizras pon far part a la festa federala. Dals 66 lutgaders che la federaziun da la Svizra dal Nordost NOS po trametter a Pratteln èn quatter grischuns. Il leader Armon Orlik, lura il rutinà Roman Hochholdinger, Marc Jörger e per finir anc Christian Biäsch. Corsin Jörger è nominà sco segunda reserva e po be far part a la festa federala sch'i avess anc da dar ferids.
Pli paucs, dentant anc adina ina buna basa
La testa dals lutgaders grischuns è vegnida in zichel pli pitschna. Quai ha dentant er da far cun feridas. Gist in pèr lutgaders grischuns ch'avessan la classa dad ir a la festa federala èn ferids. Sper la testa datti anc adina in bun dumber da lutgaders d’amez e lutgaders giuvens che vegnan suenter. Cler, uss èn las annadas cun damain naschientschas plaunet en la vegliadetgna ch'ins po far la lutga tar l’elita. Er qua datti damain lutgaders sco pli baud, quai ha dentant er da far cun la vasta purschida da pussaivladads en noss chantun e cun quai che blers giuvens chalan cur ch’els cumenzan cun in emprendissadi u cun ina scolaziun.
Infrastructura è impurtanta, dentant betg decisiva
La differenza da l’infrastructura en il chantun Grischun è frappanta. Ad Vaz Sut han ils lutgaders construì ils davos dus onns ina stupenta halla da trenament, senza in sulet franc dal maun public. Qua èn las pussaivladads da trenament perfetgas e perquai emprovan ils giuvens lutgaders engiadinais da vegnir almain ina giada il mais ad Untervaz en il trenament. Tar auters clubs da lutga en il Grischun n'è l’infrastructura betg uschè avanzada. Tar mitga club en Grischun han ins dentant la pussaivladad da trenar quest sport. Il pli impurtant è en mintga cas il plaschair.
