Atgnamain vess Eligius Tambornino gia astgà currer avant diesch dis per l’emprima giada en la cuppa mundiala da biatlon. Pervia d’ina grippa ha el dentant stuì stuschar sia premiera. Enstagl ad Oberhof en igl ost da la Germania ha Tambornino gì sia premiera pir quest venderdi a Ruhpolding en Baviera. Mo sia furma ha patì in pau pervia da la grippa.
La grippa ha tartignà in pau la cursa
Uschia ha Eligius Tambornino lura era betg cuntanschì il resultat giavischà tar sia premiera. Cun trais culps sbagliai da diesch es el vegnì 72avel. Malgrà quai ha el manchentà mo per pauc sia finamira persunala da vegnir en ils emprims sissonta. Mo bun ventg secundas han mancà. Donn è quai en quest senn perquai che mo ils emprims sissonta dal sprint astgan parter a la proxima cursa, quella da la persecuziun. Avant la grippa vessi el pudì currer bun ina mesa minuta pli svelt è Tambornino persvadì.
Bleras bunas experientschas da Ruhpolding
Tuttina è Eligius Tambornino turnà cun bleras bunas experientschas da Ruhpolding, in dals gronds classichers dal biatlon cun millis e millis d’aspectaturs. La glieud stettia en pliras retschas a l’ur da la loipa, quai saja in maletg sco tar las etappas da muntogna dal Tour de France.