Il passlunghist Valerio Grond ha realisà il meglier resultat da sia carriera. En il sprint da skating en il Goms ha il Grischun manchentà mo fitg stretg ina plazza da podest ed è vegnì quart. Per far il pass sin il podest ha mancà al passlunghist da Tavau la finala insatge dapli che ina mesa secunda. Gudagnà la cursa da la cuppa mundiala ha Johannes Kläbo da la Norvegia avant il Franzos Lucas Chanavat.
Tar las dunnas è Nadine Fähndrich vegnida en il final – cunter tschintg Svedaisas n'ha ella dentant gì nagina schanza ed è vegnida sisavla.
