La Svizra da 28 onns ha profità da quai che la campiunessa mundiala da la Russia, Sofia Nadyrschina è crudada ora gia baud. En il final grond è Zogg lura sa messa tras encunter Selina Jörg, la campiunessa en il slalom gigant parallel. Las duas autras svizras, Patrizia Kummer e Ladina Jenny èn stadas a pender gia en l'emprima runda da K.O.
La victoria en la disciplina dal slalom parallel è per Zogg la consequenza da sia gronda constanza. Be ina giada ha ella manchentà questa stagiun ils top 5. Ma quest incap è capità gist als campiunadis mundials a Rogla. La cuppa mundiala finescha Zogg sin plaz 3, e quai er sco meglra svizra.