Il slalom da Kitzbühel daventa la preda da Linus Strasser. Il Tudestg è sa meglierà en il 2. percurs dal quart rang fin a la testa e festivescha uschia sia terza victoria en in slalom da la cuppa mundiala. Cun 14 tschientavels secundas retard sa classescha il surprendent Kristoffer Jakobsen (SWE) sin rang 2.
Grazia a Daniel Yule è la Svizra represchentada per l'emprima giada en questa stagiun sin in podest d'in slalom. Il Vallesan perda bain anc in rang en la decisiun, i tanscha dentant cun dus dieschavels retard sin Strasser per il 3. plaz en il classament final. Ils dus ulteriurs Svizzers na pon en il 2. percurs betg propi nizzegiar lur buna posiziun e crodan anc enavos sin ils rangs 8 (Meillard) e 10 (Rochat).
Ina leva trumpada sto era il dominatur dal slalom d'enfin qua, Manuel Feller, magunar. I tanscha tar la cursa da chasa be per rang 4. Cunquai che ses emprim persequitader en il classament dal slalom, Atle Lie McGrath, croda ora en l'emprim percurs, po el tuttina bajegiar ora sia dominanza en questa valitaziun.
