Lara Gut-Behrami ha confermà sia classa e sia buna furma actuala a Kronplatz en il Tirol dal Sid. La Tessinaisa ha gudagnà il super-G da la cuppa mundiala e declassà sias concurrentas per passa ina secunda. Sin plazza dus èn communablamain la Svedaisa Sara Hektor ed Alice Robinson da la Nova Zelanda.
Il podest:
- Lara Gut-Behrami (SUI)
- Sara Hektor (SWE), Alice Robinson (NZL) + 1,09 sec.
Las ulteriuras Svizras:
- 8. Camille Rast + 1,93 sec.
- 20. Simone Wild + 3,17 sec.
Lara Gut-Behrami era gia suenter l'emprim percurs cleramain la svelta cun in avantatg da 0,59 secundas sin Alice Robinson.
Camille Rast era suenter l'emprim percurs 18avla ed ha cunquai gudagnà 10 plazzas en il segund percurs. Per ella èsi la segunda giada en roda ch'ella è sa classada en ils top diesch. Simone Wild ch'era 21avla suenter l'emprim percurs ha la finfinala anc gudagnà ina posiziun. Tschellas Svizras n'èn betg sa qualifitgadas per il segund percurs.
Per Lara Gut-Behrami è la victoria d'oz la 42avla en la cuppa mundiala. En questa stagiun ha ella gudagnà gia tschintg giadas. Sia davosa victoria ha Lara Gut-Behrami pudì festivar avant pir dus dis en il super-G a Cortina d'Ampezzo en l'Italia.
