Il French Open era l’emprim turnier da Grand Slam che Simona Waltert s’ha qualifitgada e ch’ella ha giugà sin il champ principal. Il French Open è in da quatter turniers da Grand Slam. Da giugar davant milli da persunas era per la giuvna Grischuna in punct culminant. Dentant ha la giugadra da tennis da 22 onns pers en la secunda runda. Ella saja stada dischillusa, ch'ella aveva da bandunar il turnier.
En il mund da tennis: d'in turnier a l'auter
Il medem mument ha quai era muntà per Simona Waltert ch'ella po puspè ina giada ir a chasa a Cuira. Quai è fitg da rar, cun quai ch’ella è per la gronda part dil temp en viadi dad in turnier a l’auter. Mo schon en ils emprims tschintg mais dal 2023 è ella stada en var diesch differents pajais, tranter auter Australia, Frantscha, Mexico, Stadis Unids da l’America, Germania ed Italia. Sco che la Grischuna ha detg en in intervista cun RTR n'haja ella mai giu fadia cun viagiar tant u cun encreschadetgna. Era suenter intgins dis pausa chasa a Cuira vai per Simona Waltert vinavant cun trenar e cun turniers, tranter auter era il Wimbledon a Londra.
La terrada cunter Cocciaretto
Il resultat final da la partida cunter la taliana Elisabetta Cocciaretto è 6:2 e 6:3. En l'emprima runda ha Waltert battì l'Americana Elisabeth Mandlik cun 6:1, 4:6 e 6:2. Waltert avanza perquai 25 posiziuns en la rangaziun mundiala da tennis.
Sguard enavos cun anteriur trenader
Denis Scheers era trenader da Simona Waltert cura ch'ella aveva tranter set ed 11 onns. Quatter onns ha el accumpagnà e trenà ella sin la plazza da tennis a Cuira.
Ella era quasi memia brava per la plazza da tennis, dentant fitg focussada.
Quai focus haja gidà fitg. La via per giugar tranter las meglras saja lunga e plain obstachels. Il trenader na fetschia betg la lavur per in atlet u in'atleta. Era Simona Waltert haja trenà fitg per il success.
Sco trenader haja el adina ditg ch’il resultat na saja betg il pli impurtant. Sch'ins perda, stoppian ins prender per mauns quai positiv ed emprender da quai. Quai saja in pau la filosofia ch’el dettia vinavant a tut ses scolars e scolaras da tennis. L'um che è dapi 25 onns trenader da tennis a Cuira, persequitescha anc oz ils gieus da Simona Waltert.
El è persvas che Simona Waltert è sin la dretga via e prognostitgescha ch'ella dumogna il pass ellas top 50.
Finì per giugaders e giugadras svizras
Per Belinda Bencic percunter hai dà in debachel a Paris. En l'emprima runda ha ella pers cunter ina giugadra che n'aveva gnanc dumagnà la qualificaziun. Sco lucky looser è la Russa Elyna Avanesyan vegnida en il tableau principal ed ha battì Bencic cun 6:3, 2:6 e 6:4.
Stan Wawrinka è arrivà suenter in lung cumbat da 4 uras e mesa en la segunda runda. El ha gudagnà cunter il Spagnol Albert Ramos cun 7:6, 6:4, 6:7, 1:6 e 6:4. Cunter Thanasi Kokkinakis ha el lura dentant perdì 6:1, 3:6, 6:1, 6:2 e cunquai n'èn naginas persunas da la Svizra pli en il turnier.
