Silvan Wasescha - «Mia finamira è da cuntanscher il cader C»

El haja gia baud savì, ch’el veglia far ina giada ina carriera sportiva sin skis. Ils dus davos onns da la scola superiura haja el visità la scola da talents da sport da Tavau. Là haja el pudì trenar mintga di dasper la scola in mez di. Ma per el saja stà cler ch’el veglia far in emprendissadi e betg in studi.

Silvan Wasescha ha avant curt terminà l’emprendissadi sco scrinari. En questa lavur lavura el cun in pensum da 60%, l’enviern sa deditgescha el cumplainamain al sport da skis. Wasescha trenescha en tut las disciplinas, gia pliras giadas è el stà en ils top 10 da cursas da la FIS, ina giada perfin sisum il podest. Ina sfida saja la finanziaziun dal sport da skis. Il material ed ils blers viadis custian bun 30’000 francs ad onn. El saja led ch’el vegnia sustegnì da ses geniturs, ha el ditg.