Per mussar bunas prestaziuns durant l’enviern han ins dad investir durant la stad. Quai vala en sasez per tut las sportistas e per tut ils sportists d’enviern – uschia er per ils snowboardists. E pelvair, Ricarda Hauser da Scuol ha mess la basa per las bunas prestaziuns durant l’enviern passà e la stad. A Magglingen ha ella pudì far la scola da recruta. Quels sforz as han pajà durant ils ultims mais.
L’ambiziun è quella dad esser la meglra, da gudagnar cursas e da sa sviluppar.
Emprims success en cuppa d’Europa e cuppa mundiala
Schon il december ha Ricarda Hauser procurà per las emprimas plazzas da podest cun il snowboard alpin en la cuppa d’Europa. Quai è en sasez la seria nua che la giuvna da Scuol fa la gronda part da las cursas. Sin basa da questas bunas prestaziuns è ella vegnida nominada per l’emprima giada per cursas da la cuppa mundiala a Scuol. En sia stretga patria ha ella pudì festivar il schaner la premiera sin il pli aut livel mundial da snowboard alpin. Er sch'ella n'ha betg pudì sa qualifitgar per ils finals a Scuol han ils trenaders mess vinavant sin la carta cuppa mundiala. Sper la premiera a Scuol ha la snowboardista anc pudì ir quatter giadas a la partenza da cursas da la cuppa mundiala. A la fin da la stagiun è ella stada buna da far a Berchtesgaden per l’emprima giada il sigl tranter las meglras trenta.
Profitar anc in zichel da las bunas relaziuns ed anc testar material
Suenter ils buns resultats a Berchtesgaden ha Ricarda Hauser er anc pudì ir a la partenza dal campiunadi mundial da juniors – ils ultims per la sportista da 19 onns. Cun ina tschintgavla ed ina sisavla plazza ha ella mussà a Chiesa en Valmalenco anc ina giada bunas prestaziuns. Uss, a la fin dad ina lunga stagiun, spetgan anc inqual tests da material e surtut er anc in zichel ir cun il snowboard cun amias ed amis e la famiglia. Alura basti dentant per questa stagiun. Il snowboard e la sportista pon far la pausa avant che la preparaziun sin il proxim enviern cumenza. Ed er alura vala puspè: Per mussar bunas prestaziuns durant l’enviern han ins dad investir durant la stad.