Corsin Cavegn saja ina giada engaschà enfin la fin da la stagiun per l’equipa che dat en la segunda liga. Uschia ha il club da ballape sursilvan communitgà. Corsin Cavegn ch'è stà enfin trenader assistent succeda ad Alessandro Giacomelli, ch'aveva abditgà la fin da november per motivs privats. Sustegn survegn Corsin Cavegn da Gabriel Derungs sco trenader assistent, e da Damian Arpagaus sco trenader da golis.
«Schliaziun interna – schliaziun ideala»
Per il president dal club sursilvan Vendelin Cabernard, è la schliaziun interna la schliaziun giavischada. Uschia possian els mantegnair la cuntinuitad. Co i giaja vinavant la fin da la stagiun 2019/2020 – na saja uss anc betg cler.
Nus essan fitg cuntents cun la lavur da Corsin Cavegn. El vegn a manar l'equipa enfin proxima stad. Tge schliaziun ch'i dat suenter vegnin nus a sclerir pli tard.
La finamira da l'emprima equipa da l'US Schluein Glion saja en mintga cas da restar en segunda liga. Actualmein è l'equipa sursilvana sin ina plazza da relegaziun.
RTR novitads 11:00