Nino Janki, oriundamain da Vuorz, ha gudagnà sin la senda Alvetern da la cursa da Trailrunning a Scuol. El ha duvrà 5 uras, 24 minutas ed 8 secundas ed è stà cnap 40 secundas pli svelt che Benjamin Nischler da l'Italia. Tar las dunnas ha Anne-Catherine Rigort ch'abitescha a Tavau gudagnà. Quai pon ins vesair sin la pagina d'internet da l'occurenza.
Las curridras ed ils curriders han gì da surmuntar in traject da varga 47 kilometers distanza che ha manà sur il Piz Spadla e Piz Clünas. 3'200 meter d'autezza èn stads d'absolvar.
Sin la senda pli curta «Enziana» è Flurina Eichholzer-Bott da Zernez stada l'emprima ed Arina Steiner-Riatsch da Zuoz segunda. Il podest dals umens è occupads da Marco Wildhaber, Gian Marchett Schicktanz e Isai Näff da Sent (terz plaz).
La preparaziun da Micha Steiner sin la cursa
La gronda passiun da Micha Steiner è trailrunning. Oriundamain è el da Samedan, oz viva el cun sia famiglia a Zuoz.
Cumenzà aveva Micha Steiner cun rampignar, el rampignava er sin glatsch. Alura vuleva el dentant sa muventar pli spert en las muntognas. Sia mamma ha cumprà per el in per chalzers da currer. Uschia è naschida tar el la passiun da currer pli spert pussibel e be cun pauc equipament dad in piz a l’auter.
Blers treneschan per far cursas, jau fatsch cursas per trenar, quai è il bel
Lavurar e speras trenar per la passiun
Il curridur engiadinais lavura actualmain sco assistent da sgol tar ina interpresa engiadinaisa che porscha tutta sorts sgols da transport e da panorama cun helicopter. Blers giadas è el quel lavurer che pitga en il guaud las plantas vi da la corda per ch'il pilot possia sgular davent quella planta cun il helicopter. El curra en il guaud dad ina planta derschada a l’autra, pitga quella vi da la corda da transport e fa uschia gia cun sia lavur corporala e pretensiusa insatge per il trenament. Tut il rest dal trenament fa el las sairas e durant la fin d’emna.
Emprender da currer aval e da sa nutrir endretg
Blers curridurs treneschan mo il currer amunt. Uschia vegn ins spert al limit. Tar il sport da trailrunning ston ins dentant er avair la savida co currer aval. Per far quai gist datti divers «tricks». Quai cumenza tar il gist material, fin far il gist moviment che schanegia ils schanugls ed il batschigl. Part dal trenament è sa chapescha era il dretg nutriment. Era quai san ins trenar durant in bloc da trenament e chattar ora uschia tge ch'ins cumporta bain e tge main.
