Gia da mattet gieva Mario Riatsch dad Ardez cun il velo. Ensemen cun in ami da scola gieva el magari la mesemna suentermezdi sin il pass dal Flüela. D’in quella giada n'era quai betg auter pussaivel che dad ir cun il velo, dentant gia alura til disturbava il traffic sin via. Ir cun velo tranter autos e töfs, quai n'era betg quai ch'il mattet vuleva. Uschia era il bunder grond cura che ses barba è vegnì la mesadad dals onns 80 cun in velo tut spezial si da l’Italia. In velo ch’aveva era duas rodas, dentant bler dapli girs ch'ils velos ch'ins enconuscheva.
Cun l’emprim mountainbike dad Ardez sin la chamona Cler
I n'ha betg durà ditg ch'il mattet ha dumandà ses barba Not sch’el pudess empruvar ina giada ses velo. Il velo che quel aveva prendì si da l’Italia. Uschia ha Mario Riatsch pudì prender ina saira il velo da ses barba e cun quel è el ì davent dad Ardez sin la chamona Cler. Da bundant 1'400 meters sur mar fin sin stgars 2'500 meters – cun il velo. Insatge uschia n’aveva el anc mai fatg. La tura cun il velo dal barba da cler glina sin la chamona Cler è stà ina aventura clav en la giuvna vita da Mario Riatsch. Suenter quella tura era cler, ch’el vul er in da quest velos, in velo da muntogna. Ed uschia ha il giuven sportist cumprà cun la paja da giarsun ses emprim agen mountainbike vers la fin dals onns 80.
Velo e muntognas, quai era nov
Cun ils novs velos ch’eran vegnids inventads en ils Stadis Unids e ch’èn suenter in per onns era vegnids populars en l’Europa era quai pussaivel dad ir sin sendas e trutgs vers las alps e la pizza. Fin a quella ura era quai pussaivel be a pe. L’invenziun dal mountainbike ha midà l’entir deport e las pussaivladads da far sport en las muntognas. Trutgs e trails nua ch'ins po far turas dad in lieu a l’auter tutgan ozendi tar la purschida. Mario Riatsch è er oz anc sche pussaivel en viadi sin il velo. Il mountainbike è pia restà part da sia vita.