Regiunal - Plazzas da tennis èn raras (durant l'enviern)

L'enviern stattan mo fitg paucas plazzas da tennis a disposiziun. Surtut mancan grondas hallas cun trais u quatter plazzas. La suletta halla cun quatter plazzas en il Grischun sa chatta a Vaz-Sut. A Cuira stattan durant ils mais d’enviern sulet duas plazzs en halla a disposiziun. Quai è memia pauc per in club cun bunamain 400 commembers ed ina citad cun varga 37’000 abitants.

Era en las regiuns pli periferas – gea surtut en quellas regiuns – è la purschida fitg limitada. En l’Engiadina datti be ina halla a San Murezzan. Ed era en Surselva exista mo pli ina halla da tennis. La halla a Mustér porscha duas plazzas.

Duas hallas novas portan meglierament

I dat dentant era dus projects che pudessan meglierer almain in pau la situaziun:

• A Domat, nua ch'i dat duas plazzas en ina halla da termo (ballun), vegn installà per quest enviern ina halla nova sur quatter plazzas.
• A Claustra vegn bajegià ina halla cun duas plazzas da tennis ed ina plazza polivalenta sin la quala ins po era dar tennis.

Plan per halla da tennis a Glion resta en il truchet

Era per meglierar la situaziun en Surselva datti in project. Ina gruppa da lavur dal club da tennis Glion aveva elavurà avant quatter onns in project. Il plan è da bajegiar ina halla da tennis permanenta en la citad da Glion. Enfin ussa èn ins dentant betg anc vegni fitg lunsch. Il problem è, che la vischnanca da Glion na po ord motivs finanzials betg sustegnair il project. Uschia che la schanza è pitschna, ch’ina halla da tennis vegn realisada en il proxim temps a Glion.

Durant igl enviern èn las plazzas da tennis en il Grischun raras.