L’aventura da far part ina giada ad ina rallye che parta a Genua cun bartga en direcziun dal Maroc e da far là in gir da circa 5'000 kilometers è naschida avant in onn. Quatter giuvens da Scuol han gì questa idea, ed els han realisà questa idea. Cun in auto da passa 20 onns e be 50 PS e cun in töf ch’è er uschè vegl han els traversà il Maroc.
Sablun, sablun ed anc ina giada sablun
La rallye ha pelvaira cumenzà a Tanger en il Nord dal Maroc, da là ha la cursa, nua ch'i na va betg per il temp, mabain per puncts, fatg il gir sur las muntognas da l'Atlas fin a Marrakesch e la Sahara, ed alura puspè enavos. Sin quests 5'000 kilometers ha il quartet passentà numerusas aventuras e nundumbraivels inscunters.
Savens han els stuì prender rutas sper las vias. Uschia ch’els èn restads fitgads diversas giadas en il sablun. Cun l’agid dad auters participants da la rallye e cun blera lavur da maun cun palar, èn els mintga giada stads buns da sa far liber.
Glieud fitg cordiala
Sin il viadi da 5'000 kilometers ha quai dà magari la situaziun ch'ins n’aveva betg gist in'hotel en il lieu da l’arrivada da l’etappa. Uschia è quai ina giada capità che l’unic hotel en il lieu era serrà ed il proxim lunsch davent. En il discurs cun ils indigens han quels alura purschì in letg tar els a chasa. Magari han ins il sentiment, pli pauc che la glieud ha e pli gugent partan els quest pauc cun visitaders da l’ester.
