-
Bild 1 von 13Legenda: Ina cuntrada magnifica. Seraina Derungs -
Bild 2 von 13Legenda: Pausa da mezdi en il desert. Seraina Derungs
-
Bild 3 von 13Legenda: Seraina Derungs amez il guaud. Seraina Derungs
-
Bild 4 von 13Legenda: Cactus e flora en il desert. Seraina Derungs
-
Bild 5 von 13Legenda: Vista sur lais, vals e culms dals Stadis Unids. Seraina Derungs
-
Bild 6 von 13Legenda: Crater Lake en il stadi dad Oregon. Seraina Derungs
-
Bild 7 von 13Legenda: La tenda è pronta per ir a letg. Seraina Derungs
-
Bild 8 von 13Legenda: En il desert curt davant Kennedy Meadows. Seraina Derungs
-
Bild 9 von 13Legenda: Seraina ha entupà blera glieud sin il PCT. Seraina Derungs
-
Bild 10 von 13Legenda: Vaschias sin ils pes. Seraina Derungs
-
Bild 11 von 13Legenda: Sin viadi en il parc naziunal da Yosemite. Seraina Derungs
-
Bild 12 von 13Legenda: Seraina a Sierra Nevada. Seraina Derungs
-
Bild 13 von 13Legenda: Igl è dumagnà. Arrivada al cunfin cun il Canada. Seraina Derungs
L’entschatta d'avrigl 2019 è Seraina Derungs sgulada vers l’America per sa metter en in’aventura tut speziala. Dals 9 d’avrigl fin ils 17 da settember è la giuvna Lumneziana viandada cun satgados sin quest trail en il vest dals Stadis Unids. Cumenzà ha il viadi a Campo en il sid da la California. Fin al cunfin dal Canada maina il viadi er tras ils stadis dad Oregon e Washington. Il pli aut punct da questa tura è cun 4009 meters sur mar il pass Forester en la California.
Quella damaun ch’jau hai entupà in urs hai jau gì tanta tema, che jau ma sun dumandada tge fas propi qua.
Adina pli lunsch
Seraina Derungs ch’ha oz 33 onns ha cumenza il viadi patgific cun far di per di bun 10 miglias, pia bun 16 kilometers. A la fin da ses viadi saja ella dentant bain savens ida 30 miglias a di a pe (bun 50 kilometers) per arrivar al cunfin cun il Canada. Persula saja ella mai propi stada, ella haja entupà blera ed interessanta glieud che haja medemamain fatg quest viadi, di Seraina Derungs.
Cun il minimum sin viadi
Sin quest viadi ha Seraina Derungs passentà passa 5 mais ora en la natira, per gronda part davent da la civilisaziun. Motivà da far quest viadi haja ella er il film «Wild», in film che sa tracta d’ina giuvna ch’ha fatg sac e pac e vivida per lung temp en ina cuntrada selvadia, er per metter d’in maun tut ses quitads e problems. Seraina è viagiada cun in satgados cun il minimum. Betg mancà n'ha sa chapescha il satg da durmir, in buglider da cuschinar cun gas, resti, aua e mangiativas e la camera per documentar quest viadi.
Insanua mal hai jau gì mintga di, l’entschatta vid ils pes, a la fin vid l’entir corp.
Malgrà ils strapatschs faschess Seraina Derungs oz cun in zic distanza puspè in tal viadi. I restia numnadamain immens bler enavos. Ma suenter passa 5 mais saja ella era stada cuntenta da puspè pudair turnar a chasa, enavos en la civilisaziun e simplamain seser giu e na far nagut pli.