Regiunal - Nevin Galmarini è sportist grischun da l'onn - Sport

Regiunal Nevin Galmarini è sportist grischun da l'onn

L'Engiadinais è vegnì undrà a la notg dal sport grischun sco meglier sportist dal 2018. El è sa mess tras encunter concurrents sco la biatleta Irene Cadurisch u il goli da ballape, Seraina Friedli.

Autor: Gian Carlo Candinas

09.06.2018, 04:08

Nevin Galmarini guarda enavos sin ina stagiun d'enviern 2017/2018 sensaziunala. A Pyeongchang è l'Engiadinais vegnì campiun olimpic en il slalom gigant parallel. Plinavant ha Galmarini era anc gudagnà la cuppa mundiala generala.

audio

Nevin Galmarini è sportist da l'onn

ord Sportissimo dals 09.06.2018.

laschar ir. Durada: 2 minutas 26 Secundas.

Cun questa undraziun è Nevin Galmarini uss en ina liga cun Dario Cologna, Nino Niederreiter u Nino Schurter, ch'èn era gia vegnids undrads sco sportists grischuns da l'onn.

Ulteriura undraziun per in atlet engiadinais

Cun Luca Tavasci è in segund Engiadinais vegnì undrà venderdi saira. Il passlunghist ha gudagnà il premi sco meglier sportist grischun cun impediment.

audio

Luca Tavasci - Sportist grischun da l'onn cun impediment

ord Sportissimo dals 09.06.2018.

laschar ir. Durada: 34 Secundas.

Sco newcomer da l'onn è il freeskier da 18 onns Rafael Kreienbühl vegnì undrà. Il titel sco equipa grischuna da l'onn han ils Calanda Broncos dal american football survegnì. Ed il premi sco funcziunari da l'onn è i a Carl Frischknecht, ch'è vegnì undrà per sias diversas funcziuns en il sport da tir.