L’equipa da la chapitala ha pir bun quatter minutas avant la fin dal gieu pudì egualisar al 1:1 entras in gol Lars Frei. Uschia ha Cuira almain pudì turnar a chasa cun in punct. Il gol decisiv al 2:1 ha Huttwil sajettà suenter be 26 secundas da la prolungaziun.
Il EHC Arosa ha dà oda maun la victoria gia fin la mesadad dal gieu. Suenter bun 30 minutas manava Lyss gia cun 3:0. Pir bun duas minutas avant la fin ha Janis Egger pudì sajettar l’emprim gol per Arosa en la nova stagiun ed uschia scursanir al 1:3.
La schanza da far meglier survegnan las duas equipas grischunas gia la mesemna, ils 20 da settember. Lura pon tant Cuira sco er Arosa dar lur emprim gieu da chasa. Il EHC Cuira frunta a las 20:00 uras sin il EHC Bülach ed il EHC Arosa dat a las 20:00 uras encunter il EHC Frauenfeld, il leader suenter l’emprima runda da campiunadi.
Sguard enavos sin la stagiun passada
Omadus equipas grischunas da la MyHockey League han persvadi la stagiun passada durant la qualificaziun. Il EHC Cuira ha terminà la qualificaziun sin plazza dus, il EHC Arosa sin plazza trais. «Sin il mund» o meglier detg enavos en la realitad è il EHC Cuira crudà en ils playoffs. Alura cura che i va per la liongia ha Cuira desdi. L’equipa dals trenaders Reto e Jan Von Arx ha pers gia en l’emprima runda da playoff ed è crudà or da la decisiun.
Il project da manar il EHC Cuira enavos a la testa da la My Hockey League dovra anc in zichel peda. Puspè ha la squadra sa midada fitg ferm. Ed ils frars Von Arx lavuran vinavant vi da l’equipa che vuless a la fin puspè esser cumpetitiva. Almain en la terz auta liga da hockey svizra. Ins sa spetgar che la squadra è puspè tranter las meglras quatter da la liga.
EHC Arosa stà megliers che quintà
Er il EHC Arosa ha persvadi la stagiun passada cunzunt durant la qualificaziun. La squadra ha segira mussà meglras prestaziun sco quai che ins pudeva spetgar. A la fin ha quai basti per vegnir en ils mezfinals dals playoffs. Cunter Martigny n’ha ha Arosa dentant tegnì nagina schanza.
L’ultima stagiun dad Arosa d’era propi fitg buna. Ed er en ils playoffs han els mussà fermas partidas. A la fin avess ins perfin pudì spetgar anc in zichel dapli. Arosa na vegn betg pli ad esser uschia ferm sco la stagiun passada. Il mez final vegn a restar in siemi.