Sia carriera avess gia pliras giadas pudì esser a fin, declera Mauro Caviezel, guardond sin las bleras blessuras ch'han adina puspè franà il skiunz grischun. Surtut suenter ses trauma dal tscharvè avant dus onns saja la via enavos stada difficila. Suenter ses grev accident il november a Lake Louise, cun in ulteriur trauma dal tscharvè, era el en ses chau atgnamain pront dad anc ina giada cumbatter per turnar.
Jau n'hai absolut naginas regurdientschas da quest di.
Quai na pudair sa regurdar lascha er a Mauro Caviezel tschentar la dumonda sch'el era quest di propi 100% pront per il comeback a Lake Louise. E la ristga dad anc ina giada vegnir en uschè ina situaziun, na saja betg da responsar envers el e sia sanadad e surtut era envers sia partenaria e sia famiglia.
El conceda dentant era ch'i saja stà ina greva decisiun da propi terminar sia carriera, da chalar cun quai ch'el haja fatg da pitschen si cun tant plaschair ed engaschi. Il sport da skis hajà dà enavos ad el uschè bler, bleras emoziuns ed era blers success. Ils pli gronds segir la culla pitschna da cristal sco meglier en la disciplina Super-G (2019/20) e lura segir sia medaglia da bronz en la cumbinaziun al campiunadi mundial a San Murezzan (2017). En la cuppa mundiala è el stà 12 giadas sin il podest.
Igl è stà ina scola da vita, la vita da skiunz. Ella m'ha caracterisà, furmà e fatg tar quel che jau sun oz. Per il proxim chapitel sun jau avert ed era spannegià tge che la vita ha anc pinà per mai.
Or da l'archiv:
