2. liga
L'EHC San Murezzan batta ordaifer ils Dürnten Vikings cler cun 6:3. Era sche Dürnten è ì svelt en avantatg ha San Murezzan anc en l'emprim terz pudì egualisar ad 1:1. Er en il segund terz è Dürnten puspè ì en avantatg, ma quella giada han ils Engiadinais reagì pli spert ed intensiv ed èn ì en la segunda pausa cun 3:2.
Ed en il davos terz han ils Grischuns davent da l'entschatta mussà nua ch'il gieu giaja. Gia suenter trais minutas stevi 5:2 per San Murezzan. Dad omaduas varts hai vers la fin anc dà in gol ed il gieu è ì a fin cun ina clera victoria grischuna.
Lai-Valbella gudogna derbi grischun
Gist cun 7:1 finescha la partida tranter Lai-Valbella ed il CdH Engiadina. Ed ì èsi spert al cumenzament, cun trais gols per Lai-Valbella las emprimas sis minutas da la partida. Il sulet gol per ils Engiadinais è crudà en il segund terz, n'ha dentant gì nagin effect sin l'andament da la partida.
My Hockey League
L'EHC Cuira ha pers cunter in da ses pli dirs adversaris, Huttwil – cun 3:4 suenter sajettar penaltis. Suenter dus terzs manava Cuira cun 1:0, grazia ad in gol en la quarta minuta. En la 46avla minuta han ils giasts lura pudì egualisar, e perfin ir duas giadas cun in gol en avantatg. Pir en la davosa minuta dal temp regular ha Cuira pudì egualisar al 3:3. Suenter ina prolungaziun senza gols, ha Huttwil lura fatg tut cler en il sajettar penaltis.
A chasa ha l'EHC Arosa pudì festivar ina victoria. Cun 5:2 han ils Grischuns gudagnà cunter Lyss. Suenter l'emprim terz era Arosa anc cun 1:2 en retard. Cun trais gols en il segund terz è il maletg lura sa midà. Il davos gol è lura crudà en la 50avla minuta – al resultat final da 5:2 per Arosa.
1. liga
Il HC Partenz-Signuradi è stà giast a Lucerna – ed è turna cun tut ils trais puncts, grazia a la victoria da 2:1. En la quarta minuta èn ils Grischuns ids en avantatg, tras in gol da Curdin Lampert. Pir suenter 35 minutas hai lura dà il segund gol, il 2:0 tras Gianni Hertner. Lucerna ha bain anc pudì scursanir al cumenzament dal davos terz, dentant senza pudair volver il gieu.