Ils emprims set gieus da la stagiun ha Partenz Signuradi gudagnà, en l'otgavel gieu è la seria ida a fin. La squadra grischuna perda a chasa 2:4 cunter l'EHC Burgdorf. En in gieu cumbattiv ha la squadra bernaisa nizzegià dus powerplays en il segund terz. Als Grischuns èsi gartegià da scursanir sin 1:2 e plir tard 2:3, d'egualisar n'èsi dentant betg gartegià ed uschia hai dà l'emprima terrada da la stagiun. En la tabella è Partenz Signuardi cun quai sin plaz dus.
Victorias per Arosa e Cuira
Arosa gudogna cun 4:1 cunter Bellinzona. La victoria n'è betg ina surpraisa. Arosa è en furma, dals ultims 10 gieus ha Arosa be pers in. Tut auter guardi ora tar la squadra da Bellinzona. Cun la terrada a chasa cunter Arosa perdan ils Tessinais per la 8avla giada en seria.
Suenter be in victoria en trais gieus ha Cuira puspè gudagnà e quai a chasa cunter Frauenfeld cun 5:4 suenter prolungaziun. Gist en l'ultima minuta dal terz terz ha Frauenfeld pudì gulivar sin 4:4. En la prolungaziun ha Cuira lura dentant sajettà il gol decisiv.
En la tabella è Cuira sin il segund plaz – quai be cun in punct pli pauc che Huttwil. Arosa suonda sin il terz plaz cun in punct damain che Cuira.