L'EHC Cuira ha gudagnà ordaifer cunter Thun gist cun 4:1. Suenter il gieu pon ins dir che la decisiun è crudada en l'emprim terz: Bain ha Thun fatg en la 9avla minuta l'emprim gol. Anc en l'emprim terz ha Cuira betg be egualisà, mabain er pudì ir cler en avantatg cun sajettar trais giadas il puc en il gol. Il quart ed ultim gol en l'ultim terz ha lura definitivamain decis il gieu a favur dals hockeyans da Cuira.
L'EHC Arosa ha pers il duel tranter il terz ed il quart da la Myhockeyleague cunter l'EHC Thun cun 2:5. Il gieu n'ha betg cumenzà bain per l'equipa grischuna. Suenter 21 minutas era ella gia 0:3 enavos, il 3:1 en il segund terz ed il 2:4 en la 54avla minuta n'han betg bastà per in comeback.
Partenz-Signuradi batta ordaifer Wil
Ordaifer ha Partenz-Signuradi battì en 1. liga l'EC Wil cun in cler 3:1. Ils Grischuns han gia da l'entschatta mussà tgi ch'è il schef sin plaz. Suenter be 40 secundas ha Yannick Bucher gia sajettà l'emprim gol. En il segund terz ha Wil curt pudì egualisar, ma gnanc duas minutas pli tard era Partenz-Signuradi puspè en avantatg tras in gol da Marc Naef. 30 secundas avant la fin dal gieu ha Andreas John lura cementà la victoria – el ha sfundrà il puck en il gol vid da Wil.
Lai-Valbella cun victoria cunter il chau da la tabella
En la segunda liga ha Lai-Valbella battì cleramain il chau da la tabella Diesldorf-Niederhasli cun 5:2, suenter che l'emprim terz eri anc 2:2, la squadra grischuna è dentant stada cleramain meglra en ils ulteriurs dus terzs.
Auter hai guardà ora tar San Murezzan, ch'era fin uss sin plaz dus da la tabella. Cunter il SC Weinfelden, che aveva fin uss be fatg dus puncts en ses gieus, ha la squadra da l'Engiadin'Ota pers nunspetgadamain cun 2:6. Suenter 40 minutas era il gieu anc avert cun 2:2, en l'ultim terz ha San Murezzan dentant gista laschà en tschintg gols ed uschia pers il gieu cleramain.
Ina terrada ha er il Club da hockey Engiadina stuì nudar. A chasa ha Engiadina pers cun 3:4 cunter Kreuzlingen-Konstanz. Ils adversaris han gia pudì far en las emprimas minutas dus gols (4. e 8. minuta). Vers la fin da l'emprim terz e l'entschatta dal segund terz ha Engidina bain pudì far trais gols e cunquai ir en avantatg. Ils giasts han però pudì gulivar ed ir en avantatg en il segund terz. L'ultim terz n'è nagut sa midà pli vid il resultat.