Las ambiziuns da las equipas grischunas en la MySports League èn grondas. Tant l'EHC Arosa, sco era l'EHC Cuira han annunzià lur interess da dar en il proxim futur en la Swiss League, quai è la segund auta liga da hockey en Svizra. Per far quel pass vul quai sa chapescha ina basa finanziala solida, e lura era la prestaziun sportiva. Actualmain cumbatta dentant mo pli l'EHC Arosa en ils playoffs da la MySports League. Per l'EHC Cuira va quai en la runda da relegaziun mo pli per l’onur.
EHC Arosa en il quartfinal
L’equipa dal Scanvetg ha terminà la qualificaziun en la MySports League sin la setavla plazza. En l’emprima runda da playoff cumbatta la squadra uss cunter Huttwil per far il proxim pass. La finamira da l’equipa che ha gudagnà da curt la cuppa svizra da hockey encunter Dübendorf, èsi da dar il final. Alura è tut pussaivel. Per cuntanscher quella finamira vul quai dentant la victoria encunter Huttwil en il quartfinal, ed alura er la victoria cun in pussaivel adversari en il mezfinal. La via e pia anc lunga.
EHC Cuira dat anc per l’onur
Entant che Arosa è sa qualifitgà per la runda decisiva en la MySports League n'ha quai betg tanschì per l'EHC Cuira. L’equipa cun ils novs trenaders Reto e Jan von Arx n'è betg da la partida. Perquai dat Cuira la runda da relegaziun. Quai èn anc sis partidas, nua ch'i va per Cuira per l’onur. Cun il davos gieu da qualificaziun encunter Basilea as ha l'EHC Cuira numnadamain segirà ina plazza en la MySports League.