Sin il glatsch erani pli baud adversaris. Per exempel en ils duels dal HCD cun Reto von Arx encunter ils ZSC Lions cun Claudio Micheli u durant ils duels da l'EHC Cuira cun Harijs Vitolinsh encunter il SC Berna alura anc cun Renato Tosio. U era en ils derbis tessinais dal HC Lugano cun Sebastien Reuille encunter il HC Ambri Piotta cun Paolo Duca. Sper il glatsch hai dentant dà bleras amicizias. Amicizias ch'èn restadas fin al di d’oz.
Inscunter da la famiglia da hockey
Gia dapi in per onns datti il gieu da legendas. Quai è in gieu da hockey nua che legendas dattan en in gieu caritativ encunter legendas da l’equipa nua cha ils Old stars and Legends èn osps. Uschia datti questa giada en il Thomas Domenig Stadion a Cuira l’inscunter tranter las legendas Reto von Arx, Raeto Raffainer, Gian Marco Crameri, Josef Marha, Mathias Seger e Luca Cereda encunter legendas da Cuira sco Renato Tosio, Sandro Tschuor, Harijs Vitolinsh e Claudio Micheli. Enturn il gieu da legendas datti in program accumpagnant attractiv.
Idea dal Gieu da legendas è naschida tar il cumià da Patrick Fischer
A la fin da la carriera dal trenader naziunal Patrick Fischer hai dà a Zug in gieu da legendas. Legendas dal hockey naziunalas ed internaziunalas han prendì cumià da Patrick Fischer cun dar ina partida encunter ina selecziun da legendas da l'EV Zug. Daniel Pita, in dals co-iniziants dal gieu da legendas era alura en il stadion a Zug ed ha gì uschia l’idea d'empruvar d'organisar in gieu da legendas era en Engiadina. Gist or dal EHC San Murezzan, ditg la meglra equipa da hockey en Engiadina, ha quai dà bleras legendas. Roberto Triulzi, Sandro Rizzi, Raeto Raffainer, Gian Marco Crameri, ils frars Duri e Corsin Camichel, Marc Gianola, u Claudio Micheli han tuts giugà ina giada tar l'EHC San Murezzan. Uschia ha quai dà quatter gieus da legendas en Engiadina. Uss per il giubileum da novanta onns EHC Cuira datti il gieu da Legendas en la chapitala.
Las entradas dal gieu van als juniors
Sper il gieu da legendas, ch’è sa chapescha il punct culminond da l’inscunter da famiglia datti in program accumpagnant attractiv. Gia a partir da las 10:00 pon uffants da la regiun trenar sin il glatsch cun ils stars. Els pon ir per autograms e durant il gieu da legendas datti la pussaivladad dad ingiantar divers tricots cun suttascripziuns. Uschia per exempel quel dad Enzo Corvi u quel da Nino Niederreiter. Tut las entradas dal gieu da legendas van a favur da las partiziuns da juniors da l'EHC Cuira, dal HC Partenz Signuradi e da l'EHC Lai Valbella. La davosa giada tar il gieu da legendas a San Murezzan èn uschia vegnids ensemen 10'000 francs.
