En la segunda liga interregiunala ha Cuira 97 gudagnà la partida a chasa cunter l'FC Thalwil cun 3:2. L'emprim gol per l'equipa grischuna ha sajettà Mitko Gjorgjievski già en la 4. minuta. Il gol decisiv ha lura Fabio Barroso marcà en la 62avla minuta.
En la tabella è Cuira 97 sin il segund plaz cun medem blers puncts sco l'emprim, l'FC Frauenfeld.
Resultats 2. liga interregiunala
3. liga regiunala:
La US Schluein Glion ha gudagnà il derbi da terza liga cunter Trun/Rabius cun 2:1.
Gia suenter paucas minutas è Trun/Rabius ì en avantatg entras Patrizio Decurtins suenter ina bella cumbinaziun. La reacziun è dentant vegnida immediat e Schluein ha egualisà en la 12avla minuta. Il 1:1 ha Lars Caduff sajettà per Schluein cun il chau. Suenter radund 30 minutas ha Gian Sgier lura sajettà il gol decisiv per l'equipa da chasa entras in gol da distanza ch'è vegni svià dad in defensur da Trun/Rabius.
Sch'ins guarda sin las occasiuns è la victoria meritada. Trun/Rabius ha dentant pudì tegnair pitg al favurit ed ha er gì chaschuns da sajettar il 2:2. La gronda occasiun per egualisar per Trun/Rabius ha Patrizio Decurtins gì curt suenter pausa. Flurin Capaul ha dentant parà il sajet ord curta distanza cun in ferm reflex.
L’US Schluein Glion, il favurit per la promoziun, ha uschia 6 puncts sin il conto suenter dus gieus. Trun/Rabius ha anc nagins puncts.