Per il public che ha pudì guardar gratuitamain il derbi engiadinais èsi stà in divertiment. Tants gols en ina partida na datti betg uschè savens. Ils trenaders dentant n'han betg gì tant gust dal gieu, cunquai che quasi mintga attatga è stà in gol.
Suenter la mesadad da la partida pareva il gieu decidì, San Murezzan aveva fatg il 4:1. Lura dentant ha il Cdh Engiadina prendì in timeout e quel ha purtà fritg: L’equipa da l’Engiadina Bassa ha cumenzà a cumbatter e fin la 52avla minuta èsi gartegià ad Engiadina dad egualisar il gieu sin in pari da 7:7.
Timeout da San Murezzan ha purtà la victoria
Alura ha er il trenader da San Murezzan Alexander Aufderklamm prendì ses timeout. Sia devisa: Uss èsi da cumbatter per mintga puck. E l'EHC ha prendì questa devisa ed è pauc suenter ì en avantatg cun 8:7, alura 9:7 e per finir ha San Murezzan anc sajettà il 10:7 en il gol vid.
Suenter la victoria en il derbi resta San Murezzan sin plazza dus da la tabella – il Cdh Engiadina resta sin plazza otg.
Ultims duels a favur da San Murezzan
Er sch'i na dat betg adina tants gols èn ils duels engiadinais adina spezials, cunquai che San Murezzan ed Engiadina èn las grondas equipas da hockey da la vallada. Ed er sch'ils giugaders s'enconuschan ed i dat inqual amicizia - la finala vai adina per la victoria ubain anc per dapli: I va per bler prestige e per la curuna da hockey da l’Engiadina.
L’EHC San Murezzan ha gudagnà la gronda part dals derbis da las ultimas stagiuns ed ha uschia confermà per il solit la rolla da favurit. L'ultim derbi da hockey ha dentant il Cdh Engiadina gudagnà e precis là vul la squadra da l’Engiadina Bassa cuntinuar. Er sche la stagiun ha cumenzà meglier per l'EHC San Murezzan - il mument sin plazza dus da la tabella - vesa il Cdh Engiadina sias schanzas.
Il gieu n'è betg decisiv per l’entira stagiun, in derbi vul ins dentant adina gudagnar.
Sin il glatsch adversaris, sper il glatsch amis
En in derbi na datti nagins regals - er sch'ils giugaders èn sper il glatsch per part amis. Apaina che l’arbiter bitta l’emprim puck sin il glatsch vai per la victoria. Il cumbat, las emoziuns e la motivaziun èn il sal ed il paiver da mintga derbi. Tranter las equipas engiadinaisas n'è quai betg auter.
Sco coach stoss jau tegnair enavos in zic l’equipa. Nus empruvain dad ir en quest gieu sco en in auter era.
