La regiun dal Parc Naziunal vegn la fin d’emna puspè ad esser il «Mecca» dal sport da mountainbike. 1’500 ciclistas e ciclists fan part a la cursa ch’è naschida il principi dals onns 2000 e ch’exista anc adina. Durant tut quests onns è il Bikemaraton dal Parc Naziunal sa pudì tegnair. La cursa è anc adina ina da las pli popularas cursas da mountainbike en Svizra. Tant amaturs sco er profis fan la cursa da mountainbike sin ils medems trails.
Il traject è en in fitg bun stadi. Ussa va quai be pli per ils ultims detagls
Tut è pront per la cursa
Ils organisaturs dal Bikemaraton dal Parc Naziunal han ina gronda experientscha. Malgrà tut la rutina è l’organisaziun da la cursa mintga giada ina sfida. En la regiun dal Parc Naziunal prov’ins adina puspè da megliurar la cursa e dad integrar chaussas che na eran betg uschia bunas la davosa giada. La finamira è da prender ina da questas chaussas e da far meglier la proxima giada.
Premiera sin il traject roial dal Bikemaraton
Claudio Tschenett da San Murezzan ha gia fat part a bleras cursas dal Bikemaraton dal Parc Naziunal. Il ciclist passiunà da San Murezzan ha era gia gudognà differentas cursas dal Bikemaraton. Il sportist da varga 50 onns n'ha dentant anc mai fatg part a la cursa roiala dal maraton. La cursa «Vallader» sur 141 kilometers cun partenza ed arrivada a Scuol, enturn l’entir Parc Naziunal.
Uss dentant, cun passa 50 onns, ha el decis dad ir a la partenza da la cursa la pli lunga che il Bikemaraton porscha. La finamira n'è betg pli da gudagnar la cursa, dentant da mussar ina buna prestaziun en sia categoria da vegliadetgna.
