En la terza liga ha l'US Schluein Glion gudagnà la dumengia cun in resultat pauc vesì cunter Flums. Gist in 10:1 ha la tavla da resultat mussà suenter 90 minutas. En tut set giugaders han marcà almain in gol per l'USSI.
Il venderdi è Trun/Rabius stà senza schanza encunter Bogn Ragaz. Dominà il gieu a Tavanasa han ils hosps dal Son Gagl. Nando Thöny ha l'emprima giada tutgà en la 23avla minuta. 20 minutas suenter, curt avant pausa hai puspè tutgà il gol sursilvan, e puspè èsi stà Nando Thöny ch'ha sfundrà la balla. Per ses terz gol ha el silsuenter duvrà in zic pli ditg, suenter 40 minutas eri 0:3. Be quatter minutas pli tard hai alura anc dà il 0:4, Sandro Horni ha sajettà in penalti. Suenter il temp regular ha alura l'equipa da chasa anc fatg in gol. Gianin Derungs ha tutgà per il resultat final da 1:4.
2. liga interregiunala
Cuira 97 ha pers la sonda a chasa encunter il FC Dübendorf 2:3. Il gieu ha cumenzà turbulent, e fin la 6avla minuta stevi gia pari 1:1. Ed en la 18avla minuta ha Cuira perfin pudì ir en avantatg. Anc avant la pausa han ils da Dübendorf dentant sajettà dus gols. Il resultat intermediar da 2:3 en dischfavur da Cuira, è lura era gist stà il resultat final da quest gieu.
2. liga regiunala
La dumengia ha Domat dà ordaifer cunter Rorschach-Goldach 17, ed è turnà cun ina terrada da 2:3. Da pausa manavan ils Grischuns anc cun 2:0.
La sonda ha Valposchiavo Calcio pudì dar a chasa. Qua n'ha dentant betg purtà cletg, ils Puschlavins han pers 1:3 encunter il FC Altstätten. Ils giasts han cumenzà bain il gieu, e fin la 24avla minuta eran els gia cun trais gols en avantatg. Curt suenter pausa ha Nicolo Pola lura pudì marcar il sulet gol per Valposchiavo, al resultat final dad 1:3.
