La US Schluein Glion ed il CB Trun/Rabius èn er en la stagiun 2023/2024 las duas sulettas equipas rumantschas en 3. liga. Las finamiras èn dentant sco gia ils ultims onns pulit differentas tar las equipas. Plinavant hai dà tar omaduas squadras ina midada sper lingia.
US Schluein Glion – l'equipa cun ambiziuns
L'onn passà ha l'equipa da la Foppa gia communitgà avant la stagiun, ch'ins veglia far la promoziun en la 2. liga regiunala. La fin finala na hai dentant betg dal tut tanschì. L'equipa da surpraisa da Valposchiavo Calcio ha gudagnà il campiunadi en 3. liga cun tschintg puncts avantatg ed ha fatg il pass en 2. liga.
Per la nova stagiun hai dà inqual midada tar Schluein Glion. Nov scheftrenader è Patric Casutt ch'è stà fin la stagiun passada assistent da Corsin Cavegn, ch'à demissiunà suenter bun in onn amez. Plinavant hai era dà ina u l'autra midada en il cader. Da menziunar è segir la perdita dal giugader offensiv Marino Cavegn, ch'ha midà tar il FC Balzers en 1. liga. La gronda part dal coc è dentant vinavant da la partida. Uschia tutga la USSI er questa stagiun puspè tar in dals favurits per la promoziun.
Il trenader da Schluein Glion, Patric Casutt en discurs davart las finamiras per la nova stagiun:
CB Trun/Rabius – l'equipa che vul metter ina chomma als favurits
En la Cadi ha Claudio Bundi surpiglià sin la nova stagiun la batgetta sper lingia. El è in trenader ch'ha trenà ils ultims onns bleras equipas da juniors, tranter auter, èr tar il team Surselva ed ils ultims onns è el stà trenader-assistent tar il team sut 18 onns da la Svizra sidorientala.
Dapi l'onn 2019 dat il CB Trun/Rabius gia en terza liga. Entaifer quels onns èn els vegnì da fitgar pe sin quest nivel. Per gronda part è l'equipa dentant stada plazzada en l'ultim terz da la tabella.
Il nov trenader Claudio Bundi en discurs davart sias finamiras cun il CB Trun/Rabius:
U che ni che cun ils dus trenaders
Per tge stattan ils dus trenaders da las equipas sursilvanas en 3. liga? En quests audios sutvart pudais prender d'enconuscher in zichel meglier il trenader da la US Schluein Glion, Patric Casutt ed il trenader dal CB Trun/Rabius, Claudio Bundi.
