Gia baud en la stagiun actuala da la «My hockey league» – la terz'auta liga da hockey en Svizra – spetga l’emprim derbi grischun tranter Arosa e Cuira. Omaduas equipas èn partidas quasi medem ferms en la nova stagiun. Cuira forsa anc in zichel meglier ch'Arosa, perquai è l’equipa da la chapitala er in pau dapli en la rolla dal favurit.
Stupenta davosa stagiun, fin tar ils playoffs
Tant l'EHC Cuira, sco era l'EHC Arosa han giugà la stagiun passada ina stupenta stagiun – almain fin tar ils playoffs. Cuira aveva terminà la qualificaziun sin plazza dus da la tabella, Arosa be gist ina plazza suenter sin plazza trais. Uschia eran las aspectativas a las duas equipas grischunas grondas en ils playoffs. Cuira n'è dentant mai propi vegnì en la seria encunter Huttwil ed è crudà or da la decisiun gia en ils quartfinals. Arosa ha pers en ils mezfinals encunter il futur champiun Martigny. Ch'Arosa ha pudì mussar uschè ina stagiun è segir stà ina surpraisa. Da Cuira avessan ins spetgà dapli.
Emprova da far anc ina giada uschia
La fasa da qualificaziun da la stagiun passada è stada per omaduas equipas grischunas fitg buna. Durant questa stagiun vulan tant Arosa sco era Cuira far quai tuttina. Cun l’experientscha dals davos playoffs vulan ins dentant esser pli pronts en la fasa decisiva dal champiunadi.
Ina da las clavs per mussar ch'ins è pront èn las partidas da derbi. In gieu, e quel è adina decisiv. Sa chapescha ch'i na va betg per gudagnar il champiunadi, dentant per savair ch'ins è pront alura cura ch'i vegn lasura. Cun la dretga tenuta e cun la dretga purziun emoziuns pon ins gudagnar da quellas partidas.
