La cursa da mountainbike enturn il Parc Naziunal festivescha il giubileum da 20 onns. L’onn 2002 hai dà per l’emprima giada la cursa da mountainbike, il Bike maraton dal Parc Naziunal. A l’entschatta da questa cursa tradiziunala n'è dentant betg stada la sfida sportiva. La cursa era pensada sco promotur per ina purschida turistica: l'uschenumnada bike tour. L’idea da questa bike tour era da far cun il velo in gir enturn il Parc Naziunal, da pernottar insanua e che la bagascha dals osps vegnia transportada dad in lieu a l’auter.
Bike-Maraton dal PNS per promover la bike tour
L’entschatta dals onns 2000 eri in novum da pudair far ina tura cun il velo uschè lunga, nua che la bagascha vegniss transporta dad in lieu a l’auter. Per far vegnir la purschida pli enconuschenta han ils iniziants da la cursa creà il Bike Maraton. La cursa enturn il Parc Naziunal avess gì il scopo da far vegnir questa purschida pli enconuschenta. Suenter 20 onns è la cursa da mountainbike sa chapescha bler pli enconuschenta che la bike tour dad ina giada, e sa chapescha è la cursa era bler pli populara. Ils davos onns da la cursa avant la pandemia da corona, han varga 2'000 ciclistas e ciclists fatg part ad ina da las differentas cursas dal Bike-Maraton.
Survivì tut las crisas
Il Bike-Maraton è creschi sur ils onns ad ina da las pli grondas cursas da mountainbike da la Svizra. Il recept per il success dals davos dus decennis è tenor Martin Nydegger, anteriur directur da turissem da Scuol, sia diversitad. La cursa porscha cursas da differents livels. La cursa roiala è insatge per ciclistas e ciclists ambizius. Sper il traject da 141 kilometers datti dentant era cursas pli simplas. La pli nova en il sortiment è la cursa «Zernezer» che maina da Zernez 33 kilometers da la val engiu fin a Scuol en l’arrivada.
