En il Paul Grüninger Stadion dal FC Rorschach-Goldach 17 ha Valposchiavo Calcio betg pudì midar il 1:4. Suenter victorias cunter Buchs ed Abtwil-Engelburg hai pia puspè dà ina sconfitta per il team da la vallada taliana. Meglier èsi ì per Domat cunter Brühl, là èsi la fin stà 3:1. Sia davosa partida na pudeva Domat dentant betg gudagnar, il FC Winkeln aveva battì Domat 1:0.
Cuira 97 cun victoria clera cunter Rapperswil
Il FC Rapperswil-Jona 2 n'ha gì nagina schanza cunter Cuira. Suenter 51 minutas era la squadra da la chapitala grischuna gia oravant cun 4:0. Sper Mitko Gjorgjievski, che ha fatg dus gols, han er Tiziano Stolz e Dario Stöber sajettà gols. Il gol d'onur da Rapperswil n'ha betg pli midà nagut. Uschia gudogna la squadra grischuna cun 4:1 ed è puspè sur ils stritg cun 11 puncts or da 9 gieus.