Il pilot da Ferrari, Charles Leclerc, è en sia cursa da chasa, il Grond Premi da Monaco, stà il pli svelt en il qualifying. Il Monegass da 23 onns ha fatg la cursa cunter Max Verstappen en il Red Bull e Valterri Bottas en il Mercedes.
Cunquai che Leclerc ha terminà il qualifying cun in crash, sto el dentant anc tremblar in zic per la pole position. Sch'i stuess numnadamain vegnir fatg ina reparatura vi da l'auto da Leclerc sco per exempel in remplazzament dal mecanissem, lura pudessi dar in spustament da ses rang da partenza. Emprim profiteur fiss lura Max Verstappen ch'è vegnì segund en il qualifying.
Il campiun mundial Lewis Hamilton sto sa cuntentar damaun cun il plaz da partenza 7. Ils 2 pilots dad Alfa Romeo, Antonio Giovinazzi e Kimi Räikkönnen, partan da las posiziuns 10 e 14.
La cursa a Monte Carlo cumenza dumengia a las 14:20.