Gia divers onns participescha Talina Gantenbein da Scuol a cursas da la cuppa mundiala da skicross. La skiunza da 24 onns ha cuntanschì durant quest onns trais giadas ina plazza da podest. Trais giadas è ella vegnida terza. Uschia er la stagiun passada, nua ch’ella è stada sin il podest il december a Val Thorens en Frantscha. Suenter quel bun cumenzament en la nova stagiun vuleva ella far il proxim pass. Il schaner n'èsi dentant betg pli gartegià da mussar ina prestaziun sumeglianta. Tuttina ha Talina Gantenbein terminà quasi tut las cursas da la cuppa mundiala tranter las meglras 10.
Promoziun en l’equipa naziunala
Grazia a las bunas prestaziuns da la stagiun passada è Talina Gantenbein uss vegnida promovida en l’equipa naziunala da skicross. Ella è ensemen cun Fanny Smith l’unica dunna cun quest status. Quai che pertutga las pussaivladads da trenament na sa mida per la skiunza betg uschè bler. Ella era gia uss part da la gruppa da trenament da la cuppa mundiala. Uschia che quai resta quasi tut tuttina. La promoziun è però tuttina in grond segn da fiduzia en la skiunza da Scuol. Ils trenaders vulan suttastritgar cun questa decisiun las prestaziuns da la vicecampiunessa mundiala da junioras.
