Dapi tschintg onns lavura Josh Holden per l'EV Zug sco assistent da Dan Tangnes. Avant aveva el savens fatg furora sco giugader sin il glatsch svizzer, en tut 13 onns ha il center dà tar Friburg, Langnau e Zug. Uss surpiglia l'um da 45 onns il post tar il HCD, ch'è liber dapi che Christian Wohlwend ha stuì chalar sco trenader. Ils dus assistents d'enfin uss, Waltteri Immonen e Glen Metropolit restan era tar Tavau fin il 2025.
Dapi il favrer èsi enconuschent che Holden banduna l'EV Zug – per far in proxim pass en sia carriera sco trenader. Cun l'engaschament a Tavau va en vigur ses giavisch. Il HCD ha terminà la qualificaziun sco 5avel, e frunta en ils quartfinals dal playoff davent da la mesemna sin ils ZSC Lions.
Giugader «pauc simpatic»
Sco giugader da l'EV Zug (2008 fin 2018) ha Josh Holden manà inqual battaglia sin il glatsch encunter il HCD. Il Canadais è adina stà enconuschent sco giugader dir e chau furius – che ha era adina gì gugent il banc da chasti.
Nus discurrin d’in trenader e betg d’in giugader.
Ils ultims onns sco trenader-assistent tar Zug ha Josh Holden mussà ses talent er davos la banda. Gist duas giadas è il club vegnì campiun svizzer cun Holden. Jan Alston spetga dal nov scheftrenader spezialmain, ch'el chatta ina buna ballantscha tranter il success sin il glatsch e la curascha d'integrar giugaders giuvens.
