Curt avant ina storta è Fähndrich pendida en in ski d'ina concurrenta. Sin il traject guliv che maina lev ensi fin tar la guliva avant l'arrivada è Fähndrich dentant prest puspè stada tar las emprimas ed ha cun quai mussà sia top furma. La finala è ella dentant vegnida 9avla. Gia sonda po la Svizra dentant empruvar da gudagnar la proxima giada. Lura ha lieu il sprint a Falun. Total datti quest enviern anc trais sprints.
En la cursa da las dunnas ha gudagnà la Norvegiaisa Stavas Skistad. La Svedaisa Jonna Sundling, la campiunessa mundiala e victura olimpica, ha dumagnà sin plazza 2.
Grond sco sulet Svizzer en il quartfinal
Dals umens svizzers ha sulet Valerio Grond dumagnà sco 30avel ed ultim il pass en la fasa da K.O. L'um da Tavau è dentant crudà or en ils quartfinals.
Gudagnà ha il Franzos Richard Jouve encunter tschintg Norvegiais ed è vegnì terz. Johannes Hösflot Klaebo ha festivà sia 15avla victoria da stagiun e sia 37avla victoria en la cuppa mundiala en in sprint.
In classicher
Il sprint a Drammen en il sidvest dad Oslo vala sco classicher. 200 camiuns han transportà la naiv en il center da la citad cun passa 100'000 abitantas ed abitants.