Suenter l'emprima part da la cursa en il stil classic, era Dario Cologna sco 12avel anc en la gronda gruppa che manava. Sin il percurs da skating han ils Norvegiais lura fatg gronda pressiun, e mo pli paucs han pudì tegnair il contact. Cologna è currì regularmain, e sco 7avel ha el la finala pers 32,8 secundas sin il victur, il Norvegiais Emil Iversen.
Jason Rüesch è stà il segund meglier Svizzer, el vegn 19avel e perda ina minuta e mesa sin ils sperts. Il Grischun Jonas Baumann daventa 27avel, e Beda Klee 33avel. Candide Pralong ha stuì dar si la cursa.
Dominanza norvegiaisa
Il Norvegiais Emil Iversen gudogna il skiatlon da Lahti en il spurt encunter ses cumpatriot Sjur Roethe. Ils plazs 3 e 4 van era a Norvegiais, Paal Golberg e Simen Hegstad Krüger. Il dominatur dal Tour de Ski passà, il Russ Alexander Bolshunov, suonda sco 5avel – el era crudà en il davos traject a val.
Il skiatlon da las dunnas gudogna la Norvegiaisa Therese Johaug. En sia emprima cursa suenter bunamain dus mais absenza, ha ella battì sias duas cumpatriotas Helene Marie Fossesholm e Heidi Weng. Atletas svizras n'èn betg stadas a la partenza.