- Beda Klee terminescha la cursa cun partenza da massa sur 20 kilometers classic ad Oberhof en la Germania cun in bun 12avel rang.
- Erik Valnes decida la cursa en il sprint per sai.
- Davos el sa classeschan gist trais ulteriurs cumpatriots da la Norvegia.
Suenter ses 5avel rang total al Tour de Ski ha Beda Klee vinavant mussà sia ferma furma er ad Oberhof en la Germania. Tar la cursa cun partenza en massa sur 20 kilometers en stil classic ha el tegnì pitg sur l'entira distanza cun la gruppa da testa, è dentant stà en las minutas finalas senza schanza en il cumbat per la victoria dal di ed è daventà bun 12avel.
Ils ulteriurs Svizzers n'han betg pudì persvader. Jason Rüesch vegn 46avel e Nicola Wigger vegn 50avel. Els han silmain anc pudì far singuls puncts da la cuppa mundiala. Per Jonas Baumann n’hai dentant betg dà puncts sco 61avel.
Danovamain victoria quadrupla per la Norvegia
Sco gia tar il sprint il di avant è la cursa stada ferm en maun norvegiais – gia per la segunda giada en seria ha la Norvegia festivà ina victoria quadrupla. La victoria da sonda è ida sin il conto dad Erik Valnes che ha pudì sa far valair en il sprint avant Martin Nyenget, Paal Golberg e Mattis Stenshagen.
Nagina fortuna per las dunnas svizras ad Oberhof
Meglra svizra a la cursa da 20 kilometers en stil classic da las dunnas è Nadja Kälin sco 24avla. Désirée Steiner curra sin plazza 31, Giuliana Werro daventa 36avla, Marina Kälin – tar ses debut en la cuppa mundiala – sa classescha gist davostiers.
